<> E lapata'ia e le Faletupe Tutotonu – o Facebook o se tasi o auala e gaoia ai au tupe | Tautalatala.com

E lapata'ia e le Faletupe Tutotonu – o Facebook o se tasi o auala e gaoia ai au tupe

Photo Credit
Faletupe Tutotonu

(SAMOA) – Ua maitauina ma iloa e le Faletupe Tutotonu e iai i latou poo tagata solitulafono ua faia ni faiga faasolitulafono e ala i le faaaogaina o le Facebook e ave faagaoi ai au tupe na alu ai lou tigaina ma lou afu e maua (se’i tulou).

E o mai ma faaaoga auala e faapea e vave ona e mau’oa ma faatosina ia te oe o le a e maua se tupe tele pe a teu au tupe ia i latou. 

O le ituaiga pisinisi ma le oloa o loo latou faalauiloaina e ese (ma e fai si ma’ale’ale) ae o le faasinomaga e tutusa lava: teu faafaigaluega lau tupe ia i matou, ma matou toe faafoi atu ia te oe se tupe tele!

O le uiga, mo se faataitaiga, afai ae teu faafaigaluega lau $1,000 ia i latou ia, o le a e maua le $10,000 i ni nai vaiaso.  Poo le teu faafaigaluega o le $10,000 ia i latou, ma e maua ai le $100,000 i totonu o ni nai vaiaso mai le faafaigaluegaina o lau tupe.

O ai a le mana’o i ia ituaiga tupe tetelē? Ae o ni tupe lelei foi nei tupe?

Faamolemole, ia mataala ma mataitu nei faiga su’e tupe faasolitulafono i luga o upega taifailagi poo tuatusi i luga o le initaneti (e pei o le Facebook, Twitter, Snapchat, Instagram ma isi vala eseese). 

O nisi nei o taiala ina ia e malamalama ma avea ai oe o se tagata atamai e faaaogaina fesootaiga faainitaneti:

–E foliga e lelei Fesootaiga Faainitaneti, ae mo se faataitaiga, o le taimi lava e te saini ai ma faaaoga lau Facebook, e tatau ona e matuā faaeteete i tagata o loo e talanoa iai ma tagata tau faa’ole’ole i luga o le initaneti.

–Aua nei e maufaatuatuaina pe talitonuina soo se tasi e te lē silafia lelei lona tagata poo le fesilafai faafesagai foi o fofoga. 

–Afai ete le’i vaai muamua i lea tagata o loo lua talanoa i le Facebook, lona uiga e lē tatau ona e maufaatuatuaina/talitonuina ia ituaiga tagata.

–E te le o silafia poo ai tonu lea tagata o loo i le isi itu o le initaneti. 

–O nisi o tagata e foliga tausaafia ma tulaga lelei mai i luga o le initaneti, peitai, e le o ituaiga tagata moni lea e iai i latou, o latou o ni tagata leaga. 

–E le tatau ona e valaaulia se tagata solitulafono ma tagata su’e tupe i auala solitulafono e ulufale atu i lou aiga, ma e lē tatau foi ona e talanoa i ia ituaiga tagata i luga o le initaneti, auā o mea uma o loo outou talanoa ai i luga o le initaneti, o lou valaaulia lea oi latou e iloa lou olaga faitoatasi, o se mailei lenei e tatau ona e ‘alofia.

–Ma le vaega mulimuli, aua le seetia i le malū o le tai taeao i upu faatōsina e pei o le tupe maua gofie poo faiga e te mauoa vave ai pe maua ai ni ‘oa se tele.  E sili ona e faaeteete ma e ‘aloese’ mai le talanoa i nei ituaiga tagata i luga o le initaneti poo tagata foi e te lei vaai muamua iai ma lua faafesagai.   

Afai ae moomia nisi faamatalaga e faatatau i lenei mataupu, faamolemole faafesootai mai le Faletupe Tutotonu i le (+685) 34-100 poo le centralbank@cbs.gov.ws