<> Toe filifilia Rev. Dr. Tavita Pagaialii i le Tofi Taitai o le Ekalesia AOG Samoa | Tautalatala.com

Toe filifilia Rev. Dr. Tavita Pagaialii i le Tofi Taitai o le Ekalesia AOG Samoa

  • Leaders of the Assemblies of God Church in Samoa which includes 78 Congregations.
    Leaders of the Assemblies of God Church in Samoa which includes 78 Congregations.
Photo Credit
Facebook

(SAMOA) – I se feso’otaiga ma le Susuga a Rev. Dr. Tavita Pagaialii, sa ia faailoa mai ai i le sui o le ofisa fa’asalalau a le alaleo o le Talalelei Christian Broadcast i le asō e faapea, o le sailiga tofi o le Komiti Faafoe a le ekalesia Assemblies of God i Samoa lea sa faataunuuina i lona laumua i Lotopa i le aso ananafi.

Na faaalia mai e le Susuga Rev. Dr Pagaialii se iuga o le sailiga tofi a le matagaluega mo le isi lua tausaga.

O le Komiti Faafoe ua tulai mai ai o ia i le tofi Taitai.

O le Susuga a Rev. Joe Amosa i le tofi Sui Taitai. O le tofi o le Failautusi ua toe tulai mai ai foi le Susuga Rev. Faumuina Alofa Faumuina, ma le Teutupe ua toe tulai mai foi le Susuga Rev. Faafetai Fata.

O le Susuga Rev. Taei Tietie ma Rev. Malo Sefo, o Toeaiina ia o Upolu. O le Susuga Rev. Pou Tuigamala ua toe tulai mai foi i le tofi Toeaina mo Savaii.

O le agaga faafetai i le Susuga ia Rev. Joe Amosa o le sa ia i le tofi Taitai, ona o lana taitaiga i ni tausaga ua mavae atu.

Sa ia tauaveina mai le tofi Taitai i le Susuga a Rev. Dr Pagaialii, ae o lea foi ua toe se’e mai o ia e lagolagosua i lona uso auauna sa avea ma ana Sui Taitai.

E fa’apena le galuega a le Atua, e felagolagoma’i ma galulue e tusa o le fa’asinomaga a le Agaga Paia o le Atua. E tusa ai ma se ripoti a ni isi sa auai atu i le fonotaga na sailia ai tofi a le matagaluega, sa vaaia le filemu o le Atua i vaega uma o le fonotaga.

O lea foi fonotaga, sa sailia ai tofi o matata eseese. O le faasologa nei o ofisa o matata eseese: Aoga Aso Sa, Rev Lotaua Mose o le Peresitene, Sui Peresitene Rev. Vaalele Tuigamala, Failautusi Rev. Sinapi Lemalu, Teutupe Rev. Feliuai Fialii. O ofisa o le autalavou po’o le CA, Rev Tauinaola Amosa le Peresitene, Paulo Mikaele Sui Peresitene, Rev. Afa Stower Failsutusi, Teutupe le Susuga Rev. Siaosi Tonumalii.

O le talitonuga maumaututu i le paia o le ekalesia aoao i Samoa, o i latou ia ua tofia e le Atua e tulai mai i lenei vaitaimi e taitaina le misiona a le ekalesia e faalauteleina le finagalo o le Alii, ma manumaloina agaga mo lona malō.

Faamoemoe i le alofa o le Atua e fesoasoani i ona Taitai e pei ona faamaonia i tofiga a le fonotaga a le matagaluega a le ekalesia.

Sa faaalia le agaga maualalo ma le agaga faafetai o le Susuga Rev. Dr Tavita Pagaialii i lona uso auauna ia Rev. Joe Amosa ona o le matagofie o lana taitaiga i ni nai tausaga na tulai mai ai o ia i le foe, o lona onosai ma le tofā faaleAtua. Faafetaia foi le matagaluega ona o le latou toe filifilia o ia e toe tulai mai i le tofi Taitai, o le viiga lava e foi i le Atua, o Ia o le Ao o le ekalesia.